(1845-1895) El protomártir asturiano FR. Melchor García Sampedro
AL LLETOR
Pa xinero fará dos años qu'un callóndrigo de la catedral d'Uviéo, de tanta vertú como céncia, unvió'm un llibru, maníficament' imprentáu, fasta con lletres coloráes y dalgunos santinos, nel cual llibru rellatábase la vida y martíliu del venerable apóstol asturiano Fr. Melchor García Sampedro.
Metanes na segunda fueya, con lletra de pluma, escrebió el rispetado callóndrigu Sr. Sarri (que d'illi yera el llibru) aquestes palabrines:
[...]
Y debaxo disti "autor" fexo un garabatu llargo, que ye la rúplica mesma de D. José Sarri, rial y verdadera sin que falta fága, pal casu de reconocella, la firma de tres escribanos, nin más requisitos que mió honrada palabra, que naide nel mundo atayó nunca con un ye mentira, nin cosa que se i-paezca.
La indireta, por supuesto, yera pa mín, anque antes del mió nome se i-hobies escapáo llancar un siñor don com' una casa; palabres que, más que la calidá disti probe vieyu, barruntaben la fenura y la bondá del que me les enxaretaba; pero como desto non me percaté fasta coláos muy bien díes, to confesar qu'inflé los papos y casi m'avillesgué de gusto, al veme tratáu de siñor don por aquel que lu yera de verdá, y que non me faltó pizca pa obligar á la muyer, á los fíos, y á cuantos espatuxen en mió casa, a que me fixeren la bonetada y diesen el tratamientu conrespondiente.
Anque me pruyía, non lo fice, alloriáu pe lo prencipal de les palabres del siñor D. Callóndrigu (xusto ye que yo-i lo pague en dones y en señorías, y folgárame fos' en Illustrísimes y Celéncies, que mialma meréz bien por so vertú y saber). Púdome muncho aquello de "¿no habrá quien les cante?" Porque, derechín, derechín, vienen eses palabres á tenatame la concéncia, col mesmu rixu que Lín el Gariteru dicía, antaño, á Pepón de Pachu Alonso, los domingos, na campera, pizcándolu nel brazu, acerricando el güeyu y señalando-i el punteru: "Toca, Pepón de Pachu, que quiero alloquecer la moza"
"¿No habrá quien les cante?"- Cantárales yo bonamente, sin mester de gabita nin obleru extrañu, si me golviés de venti años; porqu' entóncenes falaba la xiblata en miós llabios y nin xilgueru, nin pardu, por más que se desfixese en carretilles, había que me punxera en pié delantre. Mas hoy ¡probe de mí! fast' atarrezco allendar, y mal apenes m'atrevo á encloyar dalguna freba pel gargüelu, cuidosu de que s'agafe... ¡Tal está illi!
Antes era el amu de la xiblatina, y manexábala, al dicer de munchos catredáticos y curas párracos, bien, del todu bien; anque non decíen todo lo bien que yo pensaba; que siempre fo mayor la migaya de vanidá d'ún, que la rispetive opinión d'utros; mas agora ¡miániques! primero que pa tonáes, toy pa fervidiellu con pan blanco, picatostes y natielles zucaráes, que mal puede cantar quien pa amansar la gafez de la vista necesita gafes, si i-avaga llér daqué, y tien qu' arregláse con un canil por única ferramienta pa rucar el pan de cada día.
Vieyu y tóo, non pude, sin embargo, facer frente á la tentación qu' en forma de callóndrigu se me presentaba y bondosamente me pidía que cantara les glories d'un santu mártil de mió tierra. Apareyeme á fello; amorosé la desgonciada llira, y, en sin perder compás, qu'esto non se pierde nunca, fixe sortiesen aquellos dulces soníos que glorifiquen la vertú, les llacéries y tormentu del benditu Obispo de Tricomia, Fr. Melchor García Sampedro.
Allá va mió cantar: illi ye trebutu de veneración al protomártil asturianu; ofrenda que de rodíes i-únvia al cielu un fíu d'esta tierra, y tamién preba d'afléutu al sacerdote rispetable que comigo fizo de Lin el Gariteru, en nome suyu y nel de los curas del Prencipau.
Tómenla tóos; l'unu dend'el cielu, los utros dende la tierra, sin arreparar na homildá del presente.
Non son ya ¡mal pecao! miós cantares frescos y llozanos como los de los rapazos qu'escomiencen, co los resplándios del alba, á subir l'emprunáu camín de la vida; sinón menancóniques resonancies del vieyu que, al esnidias' el sol, toca temblando y, ya del camín ena cimera, da consigo nel sepulcru aonde la huéstia lu embúrria selemente.
Miós cantos non son de música que vien, son de música que s'allueña; non son les mañanines d'Abril, que llamen al cantor pa les bodes de la tierra; son les tardes del plomizo atapecer del otoño, que lu conviden á los funerales de les flores: ya non puedo arrincar á la xiblata sones d'esperanza, sinón xemidos y adioses de tristes despedides y ausencies doloroses.
Cantar el martíliu d'un santu, ye rezar, y el rezu ye tovía lo miyor que sal de mió llira.
Queda explicao lo por qué fice isti llibriquín: mandáronmelo, y como el refrán diz "qu'obedecer ye amar", obedecí.
Mioya non ye la culpa.
¡Bona dicen, que fo mió xiblata! Empero, agora... ¡oyei!...
Tras del fuéu - Por la siñal - Lo porqué d'una fiesta en Oviéo - Un llibro. - Viaxe gloriosu - Una cita pa la panera
I.
Como boca de llobu está la noche,...
El agua á barcaláos cái con fuerza,
Y al rellumu azufráu sigu' el tronu,
Ruxendo po los altos la tormenta.
Xibla furiosu el vientu, y á so pasu
Desgoncia y esfuñica cuanto alcuentra,
Y sonsañando lloros, más dañible,
Fai bailar á so ántox' una portiella.
Tamién pe les altures hay custiones...
Cuando la lluna se pronuncia en fuelga
Y estrelles y lluceros s' enfociquen,
Entós la tempestá ye cosa cierta.
Dos ñubes ente sí contrapuntiáes,
Una cúido pernal y l´utra piedra,
Y del alcontronazu ñaz la chispa
Qu' á veces al mortal calabre dexa.
Ya de capa caída fuxe Marzo,
Que fartos nos dexó d' orbayu y niebla...
Pa lo bien que lo fexo el tarabicu,
Que se vaya con Dios y que non güelva.
Pues güenó, nista noche, más escura
Que mina sin candil ó sin llinterna,
Rodiáu de los suyos, Lín el Tienru,
Que ya cerquina está de los setenta,
Viendo que los rapazos, de les nueces,
Manzanes y mayuques dieron cuenta,
Reparando nos güeyos piesllerones,
Con reflúndiu, faló d' esta manera:
-Ya que, gracies á Dios, sin merecello,
Cada cual esmorgó la so escudiella,
Y boroña á fartar non falta en casa,
Ni lleche, quesu, güevos ó mantega.
Primero que del sueño los barruntos,
A módu de pigazu en naide vea,
Alabar al Siñor, miós rapacinos,
Ye, más qu' obligación, xosticia nota.
Oyei como el granizu, al baxar, foscu,
Restralla, escócia y roda so la teya,
Y desatáu el vientu, fai les rames
Del álamu xentil besar la tierra.
Cuantos probes, ¡ Juasús ! tristes, famientos,
Sin castra de zapatu ó de madreña,
Pedirán, á estes hores, llagrimosos,
Un garítu, por Dios, de puerta en puerta.
Nosotros, xunt' al fuéu, calentinos,
Al descansu brindándonos la fueya,
¿ Qué muncho qu' al Siñor, siempre alabáo,
Gracies i-demos mil por so fineza?...
Por la siñal,… Pachín, non me provoques,
Dexa en paz el tizón que te fai guerra,
Y tu, Xuan, non pigaces, nin t' amurnies …
Mirái que tengo á mano la cibiella.
¡ Oh lloca humanidá ! Cuidar del cuerpu
So eternu rixu fó, y única xera,
Sabiendo que ye folla, mientr' el alma,
Del Supremu llabor, mira famienta
¿ Cuantes veces rocín llamáu fora,
Y con razón, el que na fonda orcheta
Afanósu guardas' un perru-chicu
Y dispreciás' cien rales nuna pieza ?
Pos lo mesmo el mortal, d' orgullu ciegu,
Refalfando ¡ babayu ! de soberbia,
Da más valor al barro qu' á la xoya
Que Dios añeró nél con vida eterna….
¿ Sabrá cudiáse un rey ? ¿ Faltarán frebes
Pa metéi pel focicu cuando quiera ?
¿ Llíbralu de la muert' el poderíu ?
¿ Folla non ye ? ….Pos volvi á la llamuerga.
Cuantos dicen ¡ vivimos de prestao !
Cuando el vecín esmorcielló la güestia,
Pero en viéndose fartos, los refranes
Piesllen de la memoria na bodega.
Más non será en mió casa onde s' olvide
Qu' el alma d' oraciones s' alimenta,
Y ansina como el cuerpu quier llacuáes,
Correlación col cíelu pide aquella.
Cudiáo: non l' olvidéis… Si estos conseyos
Non chais en sacu rotu, po la senda
Qu' á la gloria encamina, han de guiavos,
Sin bardial, estorbíciu ó saltadera.
Y agora que xuiciosos m' escuchásteis,
Pidiamos al Fautor de cielo y tierra
Pol triste navegante, y qu' en vosotros
La fe y la caridá faigan vivienda.
Po la patria tamién qu' á berganazos,
Esguedeyó mil veces la bandera
Del moru, que lluciendo media-lluna
Quedó cuartu-menguante na pelea.
Po la España cristiana y valerosa,
Que lo mesmo dió santos á la Iglesia,
Que grandes y esforciáos capitanes,
Ó sabios que plasmaron por so céncia.
Entóncenes la xente, arrodillada,
Presínasé al empar y homilde reza;
El güelu, de guión, la voz llevanta;
Á coru contestando la reciella.
Dimpués que la oración al cielo unviaron,
Y alimentu al candil dio l' aceitera,
Falagólos el vieyu, unu por unu,
Diciendo al mesmu tiempu que los besa:
-Ansi... ¡ guapos niñinós !... el domingo,
Si fai bono, diréis á la bolera,
Y aquel que meyor birlie, de vosotros,
Puede cuntar dend' hoy con una perra…..
Y, miániques, tamién estoy tentadu,
Ya que de formalúcos diésteis preba
A facevos saber por qué en Oviéo
S' entama como nunca una gran fiesta.
¿ Quereis que vos lu cunte ?-Sí,-dixeron,
alegres, los rapazos, que, con priesa,
Atrocaron un sitiu nel escañu
Dexando á Lín el tayu en que s' asienta.
Tusió isti, sacó la garapiña,
Y dimpués que mañosu la ximielga
Metiói cuatro surniáes, fexo allentu
Y al silencio brindó con una seña.
-Oyéi sin allendar. Al astur suelu
Guardaba la devina Providencia
La gloria d' añerar en so regazu
Xoya de tal valer y tal grandeza,
Qu' el mundo, con ser grande, podéis crello,
Si á so capa sortiese cuanto encierra
En so senu, de plata, oro y brillantes,
La metá que tal xoya non valiera.
¡ Probe vieyu... está popu ! callandino,
Un al utru diréisvos á la oreya...
¿ Qué val hoy más qu' el oro?... Les cenices
Del que sofrió por Dios muerte y afrenta.
Del que lloñe, muy lloñe de la patria,
Onde la dulce fabla d' esta tierra,
De suyo amorosina cual la xente
Qu' el primer espatuxo fincó nella,
Non s' oye prenunciar, pos á berrides,
Qu' á oyelles envidias' una nuviella,
S' entiende aquella plebe qu' esfarrapa
Al que güele á cristianu d' una llegua;
Del qu' en Dios dende neñu s' enfotaba,
Del que, de rapacín, fexo promesa
D' arrincar al demonio munches almes
Que sin lluz, sospiraben na tiniebla.
Y ansí fo; nin el mar cuando s' enfosca,
Alzándose ruxente, lu amedrienta;
Nin so fuelgu s' abluca,.. ¡ alantre ! grita,
Y el nome del Siñor benditu sea.
¿ Qué, non tengo razón ? ¿ Hay monte de oro,
Anque como el Narancu el monte fuera,
Qu' abastas' á pagar isti tesoru
Qu' amorosín el cielo nos entriega ?
Home... ¡ quita p' allá !.,. ¿ Quién con el oro
Á los güeyos de Cristo se presenta ?
El qu' espurre la pata, con el cuerpo,
Anqu' en goxos lo guarde, acá non dexa ?
Más d' isto falaremos otru día
Que m' avague algo más y gracia tenga;
Hoy solo vos diré por qué al dedillu
So historia deprendí lletra por lletra.
Cuerri un libro imprentadu, que so vida
Rellata y val un mundo cada fueya,
Escrito por un dónto sacerdote
Al qu' el cielu ayudó nista faena.
¡ Cuánto amor por el mártil asturiano
El alma del qu' escribe trasparienta !
¡ Qu' escaciplar papeles día y noche !
Fasta vellu acabáu ¡ cuánta xera !
Desque vieno á la vida, fech' un anxel,
El bondosu Melchor, fasta que riega
El anamita suelu con so sangre
D' alegría ó pesar da xusta cuenta.
Quien asturianu ye miérquelu al punto;
Y con él, á los suyos facer sépia,
Qu' isti pueblo amestar debe en so escudu
Una palma á la cruz que ye so enseña.
La ciodá de los Condes, Barcelona,
Que, por Dios y la patria, en mar y tierra
Algamaron sos fios más laureles
Que moros fexo el Ciz morder l' arena;
La que na rica fabla lemosina,
Pa que más dulce el saborgallo sea,
En troves melguerines, sos vitóries,
Proeces ó quebrantos nos recuerda;
La qu' al mundo plasmó fai poco tiempo
Lluciendo soberana intelixencia,
La que da l´ustre á España, y que trabaya,
Sin rendise xamás, como l' obeya,
Ya fexo acatamentu, nunca vistu,
A sos restos. ¡ Con cuanta reverencia
Millares de presones de rodíes,
Fasta el polvu baxando la cabeza,
Vieron sacar del xigantescu barcu
Lluciente caxa de debúgios llena,
Que guarda les reliquies del que, muertu,
Algamánus podrá la vida eterna !
Dominicu Melchor, con sos ceniees
Vienu el Santu-Domingo, lo cual preba
Qu' el padre al fíu amante non olvida
Nin ent' herexes enterráu dexa.
Añicábas' el buque fachendosu
Fumeru gomitando so caldera,
Y, al allendar ruxente, mil sospiros,
O gritos de dolor fiel asemeya.
Ya cerquina d' Asturies está el mártil;
La muy noble ciodá, na que Ximena
So mano dió al bon Ciz, onde so ñeru
Fixo la llealtá, la rial Palencia,
Hoy sí lo acubixa amorosina
Y, como Barcelona, nos da preba
Al festeyallu amante, del afléuto
Que siente po los fios d' esta tierra.
Ruxese qu' el domingo, po la tardí,
El bramar del cañón será la seña
De qu' á Oviéu llegaron los despoxos
Del mártil qu' algamó gloria perpéutua.
Será de ver la xente qu' alloriada
Va d' aquí pa-cullá, con llixereza,
Y les mil estandartes y banderes
Nes qu' el oro realce da á la seda.
¡ Que procisión, Siñor, la que s' entama !
Ciméntala el Obispo, pos la regla
A entrambos fexo hermanos, y los mares
Travesaron tamién por obedencia.
Cuido falten cenderos pal xentíu;
Pos lo mesmo na villa qu' en aldea,
Quien no pene na cama disgonciáu,
Anque glaye de fame, allá non queda.
Yo si gozo salú, bien tempranino
Triar cunto la calle de la Vega,
Y sin dexar migaya nel tinteru
Daré de las fonciones xusta cuenta.
Barrunto qu' á escuchar la Santa vida
Del benditu Melchor, con reverencia,
Colarase per casa la parroquia
Y quiciás de más Iloñe xente venga.
Como aquí non cabrán, tengo pensao
Destorgar en un verbu la panera,
El maiz recoyendo nos macones,
Y milagru será qu' ansí non quépian.
Mañana, Dios mediante, atapecío,
Vendrán con el pedániu á la cabeza,
Cosme el Nanu, Bartolu el de Xacinta,
Roque, Rufo y Román, fíos de Petra.
Chinto. Xuacu el Rucón... y si el mayuelu
Dexa en paz la campana, que ye seña
De que naide se muda al utru barrio,
Cuido qu' el Siñor cura tamién venga.
Non faltarán muyeres... bien lo siento;
Más cunten qu' al querer soltar la llengua
Y andar en patagüeyos, na corrada
Les pondré de patites, como suena.
Y agora pa la cama: cuando el alba
Faiga fuxir la noche, sin pereza,
Entamai el llabor que dicho tengo
Y todo como e xusto fecho estea.
Ansina fo, la xente al utru día
A la cita de Lín corrió contenta;
Seis candiles allumen, y el rellatu,
Dimpués d' embanastase, ansí escomienza:
……………………………………………………………...
………………………………………………………………
Nacimiento de Fr. Melchor - El neñu - L'estudiante - El dominicu - Los arbolinos del güertu de fray Melchor - L'Obispu - Martiliu y muerte del Venerable
II.
Pos ya la xente toda
s'afaya a la mió vera,
oyéime silenciosos,
que llargo non seré.
Voi á cuntar l'historia,
sublime y verdadera,
del que morrió gociósu
de Cristo po la fé.
Los qu'en Asturies viemos
riscar la lluz del día,
el probe como el ricu,
el grande ó piquiñin,
sabemos que Dios mesmu
la calma y la alegría
morar fai nisti suelu
que ¡mialma! ye un xardin
Y como per ú quiera
s'esnídia, marmullante,
el agua del regatu
que vida dió á la flor,
al ver tanta guapeza
pertochu el caminante,
mirando al cielu, esclama:
¡benditu el Criador!
Con esto, tiempo aforro
de fer nueva pintura
del pueblu, ú nació el mártil,
pos solo con dicir
que fo nostru paisanu,
el monte y la llanura
como serán de majos
podéislo persumir.
En Córtes vienu al mundo,
pueblín atopadizu
qu'apenes si s'alcuentra
nos montes de Quirós,
Cienfuegos la parroquia
ú el anxel, del bautizu
salió fechu cristianu,
po la bondá de Dios.
Melchor, el varón xusto
qu'hoy llena con so gloria
la pátria ú Covadonga
tocando al cielu está,
so nome foi de pila
y eterna so memoria,
por voluntá devina,
barrunto que será.
So má, que de Dios goce,
muyer caritatible,
llamada po los probes
"palombina sin fiel,"
de tierra á cielu el troque
llogró miras' fatible
y ansina fo; la tierra
pol cielu trocó él.
¡Probin!... quiciás seis años
de vida non cuntaba
y yera un gusto vellu
postráu ant'el altar;
cruciáes, les manines
al cielu llevantaba,
diciendo ente sospiros:
¡yo quiero comulgar!
Cuando los siete abriles
colaron, llegó el dia
de recibir el Cuerpu
de Dios nostru Siñor;
pintar el neñu el gozu
y arranques d'alegría,
pnon puedo... Figurallo
cad'unu ye meyor.
El pan en garitinos
gardaba cuidadósu
por más que de la fame
sintiés'el aguixón,
y al ¡Ay Maria Purísima!
corría persuroso
co la llimosna, dando
al trist'un allegrón.
Moneda que ganara
quedaba prisionera
fast' afayar cuitadu
pidiendo algo por Dios;
entóncenes, al dáila,
con risina melguera,
dicía: ¡quien pudiese
facer d'aquesta dos!
Los probes del contorno
al vello verter llantu
si daqué non tenía
con qué los socorrer
"isti rapaz, dicíen,
col tiempu será santu"
y páme qu'el barruntu
cumplíu se ha de ver.
Ansina como el liriu,
que riega el hortelanu,
xentil escarapulla,
creciendo derechín,
lo mesmo espiga el neñu...
Ya sabe el castellanu
y plasma á los maestros
na fabla del llatin.